Рускиот претседател Владимир Путин и Русија се соочуваат со голем недостиг на војници на првите линии на фронтот во војната со Украина, а големите загуби, односно голем број загинати и ранети, ја натераа Москва да формира баталјон од севернокорејски граѓани кои ќе им помогнат на Русите во битката во Курск.
Како што пренесува Newsweek, повикувајќи се на украинската новинска агенција LIGA, односно нејзините разузнавачки извори, Москва ќе ги пополни своите редови со војници испратени од севернокорејскиот лидер Ким Џонг-ун.
Силите последователно би можеле да бидат вклучени во борбите во југозападните региони на земјата, каде што Русија сè уште се бори против украинскиот упад што започна на 6 август.
Иако Путин прави сè што е можно за да го одложи и избегне донесувањето одлука за спроведување на новиот бран на мобилизација на територијата на Руската Федерација, секојдневните големи загуби во воена опрема и персонал ги натера Русите да спроведуваат принудна мобилизација и еднократни плаќања за војниците доброволци.
Според предвиденото, Севернокорејците ќе бидат дел од „Специјалниот баталјон Бурјат“, кој е организиран во рамките на 11-та специјална јуришна бригада на вооружените сили на Русија. Баталјонот треба да вклучува до 3.000 севернокорејски војници, кои во моментов се снабдуваат со мало оружје и муниција.
Тие треба да бидат распоредени во близина на Суја и Курск, во близина на украинската граница, потврдувајќи ги претходните изјави на портпаролот на американското Министерство за одбрана, Патрик Рајдер, кој рече дека Севернокорејците би можеле да станат „топовско месо“ во Украина.
– Гледаме растечки сојуз меѓу Русија и Северна Кореја. Овде веќе не се работи само за трансфер на оружје, туку за префрлање луѓе од Северна Кореја во окупаторските воени сили – коментираше претходно украинскиот претседател Володимир Зеленски, пренесува Newsweek.
На 3 октомври, украински и руски новински извори објавија дека шест севернокорејски војници загинале на фронтот во близина на Доњецк, а јужнокорејските власти тврдеа дека понатамошниот трансфер на војници ќе биде „многу веројатен со оглед на развојот на воените односи меѓу двете земји“.
– Путин прави сè за да ја одложи и избегне одлуката за спроведување на нов целосен бран на мобилизација на територијата на Руската Федерација – изјави извор на Киев пост од Украинската воена разузнавачка служба (ХУР).
Претходно, LIGA.net, повикувајќи се на извори на Украинската воена разузнавачка служба (HUR), објави дека севернокорејските војници се обучуваат да бидат распоредени во војната во Украина.
„Вашингтон пост“ претходно објави дека илјадници севернокорејски пешаци се обучуваат во Русија, со можност да бидат испратени во Украина до крајот на 2024 година.
Украински воени експерти изразија скептицизам за ефикасноста на Севернокорејците, опишувајќи ја нивната војска како застарена и слабо опремена.
Украинската врховна команда шпекулираше дека улогата на Севернокорејците најверојатно ќе вклучува операции со висок ризик, чија цел е да се намали притисокот врз руските сили.
Во понеделникот рускиот лидер Владимир Путин поднесе до Државната дума нацрт-закон за ратификација на сеопфатниот договор за стратешко партнерство меѓу Русија и Северна Кореја.
Клучната одредба во членот 4 од договорот вели дека доколку Русија или Северна Кореја бидат нападнати и влезат во воена состојба, другата страна ќе обезбеди воена и друга помош користејќи ги сите расположливи средства, во согласност со член 51 од Повелбата на ОН и законите на двата народа.
Владимир Путин и севернокорејскиот лидер Ким Џонг-ун го потпишаа договорот на 19 јуни за време на посетата на Путин на Северна Кореја, чиј текст подоцна го објави севернокорејската централна телеграфска агенција.
Западни извори велат дека Северна Кореја ѝ доставува милиони артилериски гранати на Русија за нејзината војна со Украина. Покрај тоа, севернокорејските воени инженери и персонал наводно им помагаат на руските сили.
Украинскиот претседател Володимир Зеленски на 14 октомври рече дека Северна Кореја не само што испраќа оружје, туку и ги распоредува своите граѓани да се борат заедно со руските војници.
